充滿愛的移民愛爾蘭故事 與愛爾蘭這片土地二十年的悲歡離合

上回說到, 第一次邀請到一位移民愛爾蘭的澳門朋友, 她推介一個專頁, 留下了伏筆, 今次就正正訪問了 愛澳之人 的 Samantha ！從這位澳門朋友的字裡行間, 看到她對愛爾蘭滿滿的愛, 她二十年前來到愛爾蘭, 深深愛上, 也在這裡找到終生伴侶, 離開愛爾蘭後始終掛念。她今天已經是一位母親, 一家回來愛爾蘭定居, 到底她的故事是怎樣的呢? 一起看看吧！

你好, 謝謝你接受訪問, 請你簡單介紹自己?

Hello，大家好，我個名叫做Samantha ，係一個定居於County Limerick 嘅澳門人，現職為一個全職媽媽。

請問當初為什麼選擇移民愛爾蘭呢?

說來話長，回想廿年前得到一個可以出國嘅機會，呢個國家就係愛爾蘭。相比起今日網上資訊發達嘅情況之下，愛爾蘭都唔係個個認識。更何況當年！但係我仍然膽粗粗咁過咗嚟，之後就愛上咗呢個地方啦！

請問你以什麼途徑移民愛爾蘭呢?

我受惠於澳葡時代，所以有幸持有葡萄牙護照留喺愛爾蘭定居生活。

有沒有在愛爾蘭的找工作的經驗可分享一下嗎?

我係愛爾蘭嘅工作經驗只有係廿年前，因為朋友介紹之下得到係中式餐館工作嘅機會，就係咁工作咗四年。之後就認識咗我嘅老公，又碰巧遇上可以去英國生活嘅機會，所以就離開咗愛爾蘭。

你最喜歡愛爾蘭的哪一方面呢?

認真咁講，其實我鍾意愛爾蘭嘅全部。年青時，我遇上一群友善嘅愛爾蘭人，佢哋完全唔介意我英文唔叻，不厭其煩咁同我傾計，教識我點樣融入佢哋嘅生活。我深愛愛爾蘭嘅生活環境，我仍然記得有一次打開屋企道大門，望到對面草坡上有一隻牛食緊草。我亦仍然記得第一次坐火車，由countryside 去Dublin沿途所見到嘅美景。我仍然記得我同老公一齊走在Dublin O’Connell Street, Grafton Street 上嘅美好時光。我覺得愛爾蘭一切都好美好，好到我認為我唔可以錯過呢個地方。好到我願意將我嘅仔女帶回此地。

有沒有在愛爾蘭的難忘經歷分享?

有好多試過有一次坐巴士由Dublin市中心返Maynooth,我坐喺上層後排座位，由上車一直瞓到落車都冇人騷擾過我。直情喺自己屋企張床都未試過瞓得咁舒服。又試過思鄉病發作，走去Tesco買隻cornfed whole chicken 煲雞粥，煲出嚟個效果又出乎意料咁好味。又試過有一次（廿年前），難得出到Dublin去到亞洲行,見到啲過期香港雜誌都已經好興奮，當年資訊仲未發達，見到少少關於港澳嘅事已經好興奮，好開心。

有沒有在愛爾蘭的不愉快經歷分享?

說沒有係呃人嘅，但係既然選擇得喺愛爾蘭生活，就要學習融入本地生活，所有唔好嘅經歷都係一次好嘅學習機會。

有什麼建議給打算移民愛爾蘭的朋友呢?

既然選擇得離開，就要百分百投入新生活！記住：沒有行唔到嘅路，只有唔肯郁嘅人。

好多朋友都想知移民後有什麼娛樂, 請問你在愛爾蘭有什麼娛樂, 消遣或興趣嗎?

其實作為一個全職家庭主婦，係好忙㗎但空餘時間我都會種吓花草，去郊外旅行，周圍睇吓。因為整個愛爾蘭咁大，我都未行晒。

有沒有其他你想加添的問題及答案?

沒有

有沒有你的專頁/公司網址分享, 讓我們更了解你呢?

話說我打算2017年同家人一齊回流，咁話晒離開咗愛爾蘭已經超過10年，就想預先上網了解一下愛爾蘭最新嘅情況，一search之下先發現原來網上講有關愛爾蘭嘅資訊真係少得好可憐。咁我自己膽粗粗，就喺Facebook成立咗一個介紹愛爾蘭生活嘅專頁「愛澳之人」https://www.facebook.com/macaoeselivinginireland。將我心愛嘅愛爾蘭推介俾大家。

*注意: 問答內容由受訪者提供 , 原汁原味, 保有受訪者風格, 也是受訪者的立場, 不代表本網站立場, 而本網站與所有受訪者亦沒有任何商業, 廣告, 等合作。訪問目的純粹為興趣, 吹水, 好玩, 以及為有興趣了解愛爾蘭人士提供真實故事, 以作參考, 多謝支持及意見!